വയനാട് മുണ്ടക്കൈ ദുരന്തത്തിൽപ്പെട്ട് ക്യാമ്പുകളിൽ കഴിയുന്നവരെ താത്കാലികമായി പുനരധിവസിപ്പിക്കുന്നതിന് ആവശ്യമായ വാടകവീടുകളുടെ കാര്യത്തിൽ അന്തിമതീരുമാനം ഉടൻ ഉണ്ടാകും.പഠിച്ച് രൂപരേഖ തയ്യാറാക്കി മുന്നോട്ടു പോകാൻ അഞ്ചംഗ സമിതിയെ നിയോഗിച്ചതായി മന്ത്രി കെ രാജൻ പറഞ്ഞു.

ജില്ലാ കളക്ടർക്കാണ് സമിതിയുടെ ചുമതല.ഇതുവരെ 65 വീടുകൾ ഉടൻ താമസിക്കാൻ തയ്യാറായിക്കഴിഞ്ഞു. എൽഎസ്ജിഡിയുടെ 41 കെട്ടിടങ്ങളും പിഡബ്ല്യുഡിയുടെ 24 കെട്ടിടങ്ങളുമടങ്ങുന്നതാണ് 65 വീടുകൾ. 34 എണ്ണം അറ്റകുറ്റപ്പണികൾ നടത്തി ഉപയോഗിക്കാവുന്നതാണ്.

മുട്ടിൽ, വൈത്തിരി, കൽപ്പറ്റ, അമ്പലവയൽ, മുപ്പൈനാട് എന്നീ പഞ്ചായത്തുകളിൽ വാടക വീടുകളൊരുക്കാനാണ് സർക്കാർ തീരുമാനം. തയ്യാറായിട്ടുള്ള വാടക വീടുകളിൽ എന്തെല്ലാം സൌകര്യങ്ങൾ ആവശ്യമാണെന്നതടക്കമുള്ള കാര്യങ്ങൾ സമിതി പരിശോധിക്കും.