മയക്കുമരുന്ന് വ്യാപനത്തിന് എതിരെ നടന്നുകൊണ്ടിരിക്കുന്ന നടപടികള്‍ നിരീക്ഷിക്കുന്നതിനായി ക്യാബിനറ്റ് മന്ത്രിമാരുടെ അഞ്ചംഗ സമിതി രൂപീകരിച്ച് പഞ്ചാബിലെ ആം ആദ്മി സര്‍ക്കാര്‍. ‘മയക്കുമരുന്നിനെതിരായ യുദ്ധം’ എന്ന പേരില്‍ യുദ്ധകാലാടിസ്ഥാനത്തിലുള്ള സമീപനമാണ് പഞ്ചാബ് സര്‍ക്കാര്‍ സ്വീകരിച്ചിരിക്കുന്നത്. ഇതുമായി ബന്ധപ്പെട്ട് പഞ്ചാബ് മുഖ്യമന്ത്രി പോലീസ് ഉദ്യോഗസ്ഥരുമായി ഉന്നതതല യോഗം വിളിച്ചുചേര്‍ക്കുകയും ചെയ്തു. പോലീസ് മയക്കുമരുന്ന് ഹോട്ട്സ്പോട്ടുകള്‍ തിരിച്ചറിഞ്ഞാല്‍, വിതരണ ശൃംഖലകള്‍ പൊളിച്ചുമാറ്റുകയും കടത്തുകാര്‍ക്കെതിരെ കര്‍ശന നടപടി സ്വീകരിക്കുകയും ചെയ്യും. കൂടാതെ, മയക്കുമരുന്ന് കടത്തുകാരുടെ സ്വത്തുക്കള്‍ കണ്ടുകെട്ടാന്‍ സര്‍ക്കാര്‍ തീരുമാനിച്ചിട്ടുണ്ട്. മയക്കുമരുന്ന് ദുരുപയോഗം തടയുന്നതിനും ഇരകളെ പുനരധിവസിപ്പിക്കുന്നതിനുമായി ഫലപ്രദമായ ഒരു നയം രൂപീകരിക്കുന്നതിലാണ് സര്‍ക്കാരിന്റെ അടിയന്തര ശ്രദ്ധയെന്ന് ഉദ്യോഗസ്ഥര്‍ പറയുന്നു.

മൂന്ന് വര്‍ഷത്തെ ഭരണകാലത്ത്, അധികാരികള്‍ 6,500 പ്രധാന മയക്കുമരുന്ന് കടത്തുകാരെ അറസ്റ്റ് ചെയ്തതായും, എന്‍ഡിപിഎസ് നിയമപ്രകാരം 30,000 ത്തിലധികം കേസുകള്‍ രജിസ്റ്റര്‍ ചെയ്തതായും, മയക്കുമരുന്ന് കടത്തില്‍ ഉള്‍പ്പെട്ട 10,000 പോലീസ് ഉദ്യോഗസ്ഥരെ സ്ഥലം മാറ്റിയതായും, മയക്കുമരുന്ന് വ്യാപാരവുമായി ബന്ധപ്പെട്ട 100 പോലീസ് ഉദ്യോഗസ്ഥരെ അറസ്റ്റ് ചെയ്തതായും എഎപി കാബിനറ്റ് മന്ത്രിമാര്‍ ചൂണ്ടിക്കാട്ടി. പഞ്ചാബിലെ വര്‍ദ്ധിച്ചുവരുന്ന മയക്കുമരുന്ന് ഉപഭോഗത്തെ നേരിടുന്നതിനായി പുതുതായി പ്രഖ്യാപിച്ച അഞ്ചംഗ മന്ത്രിസഭാ ഉപസമിതിയിലെ അംഗവും കാബിനറ്റ് മന്ത്രിയുമായ അമന്‍ അറോറ, അതിര്‍ത്തി കടന്നുള്ള മയക്കുമരുന്ന് കടത്ത് തടയുന്നതില്‍ കേന്ദ്ര പോലീസ് നേതൃത്വത്തെ സംസ്ഥാനത്ത് വിന്യസിപ്പിക്കണമെന്ന് ആവശ്യപ്പെട്ടു. ബിഎസ്എഫിന്റെ അധികാരപരിധി വെറും 15 കിലോമീറ്ററില്‍ നിന്ന് 50 കിലോമീറ്ററായി കേന്ദ്രം വര്‍ദ്ധിപ്പിച്ചു. അതിനാല്‍, അന്താരാഷ്ട്ര അതിര്‍ത്തിയിലൂടെ വലിയ അളവില്‍ മയക്കുമരുന്ന് വരുന്നുണ്ട്, കൂടാതെ 50 കിലോമീറ്റര്‍ അധികാരപരിധി ബിഎസ്എഫിന് കീഴിലാണ്,’ അദ്ദേഹം പറഞ്ഞു.

മയക്കുമരുന്ന് കടത്തുകാര്‍ക്കെതിരായ യുദ്ധം ആരംഭിച്ചതായി പ്രഖ്യാപിച്ച ധനമന്ത്രി ഹര്‍പാല്‍ സിംഗ് ചീമ, കഴിഞ്ഞ മൂന്ന് ദിവസമായി മയക്കുമരുന്ന് കടത്തുകാര്‍ക്കെതിരെ തുടര്‍ച്ചയായി ബുള്‍ഡോസര്‍ നടപടികള്‍ സ്വീകരിച്ചുവരികയാണെന്ന് പറഞ്ഞു. അകാലിദള്‍, കോണ്‍ഗ്രസ് സര്‍ക്കാരുകളാണ് മയക്കുമരുന്ന് കടത്തുകാര്‍ക്ക് രാഷ്ട്രീയ സംരക്ഷണം നല്‍കിയിരുന്നതെന്ന് പഞ്ചാബ് സര്‍ക്കാര്‍ ചൂണ്ടിക്കാട്ടി. ‘മയക്കുമരുന്നുമായി ബന്ധപ്പെട്ട എഫ്ഐആറുകള്‍ ഏറ്റവും കൂടുതല്‍ രജിസ്റ്റര്‍ ചെയ്ത സംസ്ഥാനങ്ങളില്‍ ഒന്നാണ് പഞ്ചാബ്. കഴിഞ്ഞ ഒരാഴ്ചയായി, ആം ആദ്മി സര്‍ക്കാര്‍ ലുധിയാനയിലെയും പട്യാലയിലെയും മയക്കുമരുന്ന് വില്‍പ്പനക്കാരുടെ വീടുകളില്‍ റെയ്ഡ് നടത്തിവരികയാണെന്ന് സംസ്ഥാന മന്ത്രി സഭ ചൂണ്ടിക്കാണിച്ചു.

ധനകാര്യ-നികുതി മന്ത്രി ഹര്‍പാല്‍ സിംഗ് ചീമയുടെ നേതൃത്വത്തിലുള്ള മന്ത്രിസഭാ ഉപസമിതി, മയക്കുമരുന്ന് പ്രശ്‌നം പരിഹരിക്കുന്നതിനും ലഹരിവിമുക്ത പരിപാടി നടപ്പിലാക്കുന്നതിനും പോലീസും ആരോഗ്യ വകുപ്പുകളും സ്വീകരിക്കുന്ന നടപടികള്‍ക്ക് മേല്‍നോട്ടം വഹിക്കുമെന്ന് മുഖ്യമന്ത്രിയുടെ ഓഫീസ് വക്താവ് പറഞ്ഞു.