കോടതി വിധി അംഗീകരിച്ച് എസ്ഐആറിൽ സമയം നീട്ടണമെന്ന് എം വി ജയരാജൻ ആവശ്യപ്പെട്ടു. മരിച്ചവരുടെ കണക്കിൽ പോലും ദിവസങ്ങൾക്കിടെ വൈരുദ്ധ്യം ഉണ്ടായിട്ടുണ്ടെന്ന് അദ്ദേഹം ചൂണ്ടിക്കാട്ടി. പൗരത്വ ബില്ല് വളഞ്ഞ വഴിയിലൂടെ നടപ്പാക്കാനാണ് എസ്ഐആർ ഉപയോഗിക്കുന്നതെന്നും അദ്ദേഹം ആരോപിച്ചു. പൗരത്വ ഭേദഗതി ബിൽ കേരളം എതിർത്തതിനാലാണ് എസ്‌ഐആർ കൊണ്ടുവന്നതെന്നും, അതിനെതിരെയാണ് സി പി ഐ എം ഉൾപ്പെടെ സുപ്രീംകോടതിയെ സമീപിച്ചതെന്നും അദ്ദേഹം പറഞ്ഞു.

സംസ്ഥാന സർക്കാർ കൊണ്ടുവന്നതാണ് എസ്‌ഐആർ എന്ന വ്യാജ പ്രചാരണം തെരഞ്ഞെടുപ്പിൽ ചിലർ നടത്തിയതായും ജയരാജൻ വിമർശിച്ചു. അങ്ങനെയെങ്കിൽ ബീഹാറിൽ 65 ലക്ഷം പേർ എങ്ങനെ വോട്ടർപട്ടികയിൽ നിന്ന് ഒഴിവായെന്ന് അദ്ദേഹം ചോദിച്ചു.

ശബരിമല പാരഡി ഗാന വിവാദത്തിലും അദ്ദേഹം പ്രതികരിച്ചു. അത് ഒരു ഗാനമല്ലെന്നും മതത്തെ ഉപയോഗിച്ചുള്ള രാഷ്ട്രീയ പ്രചാരണമാണെന്നും അദ്ദേഹം പറഞ്ഞു. പ്രസ്തുത ഗാനം തെരഞ്ഞെടുപ്പ് ചട്ടലംഘനമാണെന്നും ജനപ്രാതിനിധ്യ നിയമത്തിന്റെയും മുനിസിപ്പൽ ചട്ടങ്ങളുടെയും ലംഘനമാണെന്നും അദ്ദേഹം കൂട്ടിച്ചേർത്തു. അതിനാലാണ് ഇടതുപക്ഷം അതിനെ എതിർക്കുന്നതെന്നും ജയരാജൻ വ്യക്തമാക്കി.