മുത്തങ്ങ സംഭവത്തിന് ശേഷം ആദിവാസി വിഭാഗങ്ങളെ സി കെ ജാനു തിരിഞ്ഞ് നോക്കിയില്ലെന്ന് സാമൂഹ്യപ്രവര്‍ത്തകൻ എം ഗീതാനന്ദൻ. സി കെ ജാനുവിൻ്റെ രാഷ്‌ട്രീയ നിലപാടുകളെ രൂക്ഷമായി അദ്ദേഹം വിമർശിച്ചു. മുത്തങ്ങയിൽ യുഡിഎഫ് സർക്കാർ നടത്തിയ അതിക്രമങ്ങളെ വെളള പൂശേണ്ടതില്ലെന്ന് അദ്ദേഹം പറഞ്ഞു.

കേരള ചരിത്രത്തിൽ മായ്ച്ചുകളയാൻ പറ്റാത്തത്ര കുറ്റകൃത്യമാണ് യുഡിഎഫ് സർക്കാർ ചെയ്തത്. എ കെ ആൻ്റണിയും കോൺഗ്രസ് നേതൃത്വവും മാപ്പ് പറയണം. എൻഡിഎ മുന്നണിയിൽ പോയതിന് സി കെ ജാനു കേരള സമൂഹത്തോട് തെറ്റു തുറന്ന് പറയണം ദളിതരുടെ വിഷയത്തിൽ എത്രമാത്രം ഇടപെട്ടിട്ടുണ്ടെന്നത് ജാനു സ്വയം പരിശോധിക്കണമെന്നും എം ഗീതാനന്ദൻ പറഞ്ഞു.

അതേസമയം, യുഡിഎഫിൽ അസോഷ്യേറ്റായി ചേരാനുളള സി കെ ജാനുവിൻ്റെ തീരുമാനത്തിനെതിരെ വലിയ വിമർശനമാണുണ്ടായത്. 2003ൽ മുത്തങ്ങയിൽ ആദിവാസികൾക്ക് നേരെ നരനായാട്ട് നടത്തിയത് യുഡിഎഫ് സർക്കാറായിരുന്നു. ആ സമരത്തിന് നേതൃത്വം നൽകിയ ജാനുവാണ് അവസരവാദ നിലപാടുമായി ഇപ്പോൾ യുഡിഎഫിൻ്റെ കൂടെ ചേരുന്നത്.