തിരുവനന്തപുരം കോർപ്പറേഷൻ മേയർ സ്ഥാനം അവസാന നിമിഷം നഷ്ടമായതിൽ മുൻ ഡിജിപി ആർ. ശ്രീലേഖയ്ക്ക് കടുത്ത അതൃപ്തി. ബിജെപി സ്ഥാനാർത്ഥിയായി മത്സരിച്ച് മികച്ച വിജയം നേടിയ ശ്രീലേഖയെ മേയർ സ്ഥാനത്തേക്ക് പരിഗണിക്കുമെന്ന് തിരഞ്ഞെടുപ്പ് പ്രചാരണ വേളയിൽ വ്യാപകമായ സൂചനകളുണ്ടായിരുന്നു.

എന്നാൽ, അവസാന നിമിഷം വി.വി. രാജേഷിനെ മേയറാക്കാൻ പാർട്ടി തീരുമാനിച്ചതാണ് ശ്രീലേഖയെ ചൊടിപ്പിച്ചത്. തന്റെ അതൃപ്തി അവർ പാർട്ടിയെ നേരിട്ട് അറിയിച്ചതായാണ് വിവരം.

തിരുവനന്തപുരം നഗരത്തിൽ ബിജെപിയുടെ വിജയമുഖമായി ഉയർത്തിക്കാട്ടിയ ശ്രീലേഖയുടെ പിണക്കം വരാനിരിക്കുന്ന നിയമസഭാ തിരഞ്ഞെടുപ്പിൽ തിരിച്ചടിയാകുമെന്ന വിലയിരുത്തലിലാണ് ബിജെപി കേന്ദ്ര നേതൃത്വം. ഇതേത്തുടർന്ന് വിഷയം പരിഹരിക്കാൻ കേന്ദ്ര നേതാക്കൾ നേരിട്ട് ഇടപെട്ടിരിക്കുകയാണ്. മുതിർന്ന നേതാക്കൾ ശ്രീലേഖയുമായി സംസാരിക്കുമെന്നാണ് സൂചന.