മണിപ്പൂരില്‍ വീണ്ടും അശാന്തി. കുക്കി എംഎല്‍എമാര്‍ സര്‍ക്കാരിന്റെ ഭാഗമായതിനെതിരായ പ്രതിഷേധം അക്രമാസക്തമായതാണ് അശാന്തിയ്ക്ക് കാരണം. ചുരചന്ദ്പൂരിലാണ് ഇന്ന് പ്രതിഷേധങ്ങള്‍ വ്യാപക അക്രമത്തിന് വഴിവെച്ചത്.

പ്രദേശത്ത് കനത്ത ജാഗ്രതയിലാണ് സുരക്ഷാസേന. മണിപ്പൂരില്‍ സ്ഥിതിഗതികള്‍ ഇതോടെ കൂടുതല്‍ സങ്കീര്‍ണമാവുകയാണ്. ചുരാചന്ദ്പൂരില്‍ ഇന്ന് വൈകുന്നേരം പൊലീസിന് നേരെ കല്ലേറുണ്ടായി. വാഹന ഗതാഗതം തടഞ്ഞു. റോഡില്‍ ടയറുകള്‍ കത്തിച്ചും പ്രതിഷേധിച്ചു. നാളെ കുക്കി മേഖലകളില്‍ സമ്പൂര്‍ണ്ണ അടച്ചുപൂട്ടല്‍ പ്രഖ്യാപിച്ചിരിക്കുകയാണ്. കൂടാതെ ചുരചന്ദ്പൂര്‍ കേന്ദ്രീകരിച്ച് നാളെ പ്രതിഷേധ റാലിയും നടക്കും.

അതേസമയം സാഹചര്യങ്ങള്‍ സങ്കീര്‍ണമായതോടെ കൂടുതല്‍ സുരക്ഷ സേനയെ ഇവിടേക്ക് വിന്യസിച്ചിട്ടുണ്ട്.