ലോകം കണ്ട ഏറ്റവും വലിയ പണിമുടക്കിനെ പരിഹസിക്കുകയും അവഗണിക്കുകയും ചെയ്ത പ്രതിപക്ഷ നേതാവ് വി.ഡി. സതീശൻെക്കെതിരെ രൂക്ഷ വിമർശനവുമായി സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ മാസ്റ്റർ രംഗത്തെത്തി. തൊഴിലാളി വർഗ്ഗത്തിന്റെ ഐതിഹാസിക പോരാട്ടത്തെ താഴ്ത്തിക്കാണിക്കാൻ ശ്രമിക്കുന്ന സതീശൻ താനാണ് യഥാർത്ഥ ഇടതുപക്ഷമെന്ന് പറയുന്നത് പരിഹാസ്യമായ കാര്യമാണെന്ന് അദ്ദേഹം അഭിപ്രായപ്പെട്ടു.

രാഹുൽ ഗാന്ധി ഉൾപ്പെടെയുള്ള ദേശീയ നേതാക്കൾ സമരത്തിന് ഐക്യദാർഢ്യം പ്രഖ്യാപിച്ച സാഹചര്യത്തിൽ, കേരളത്തിൽ മാത്രം സമരദിനത്തിൽ ജാഥ സംഘടിപ്പിച്ചത് ഏത് നയത്തിന്റെ ഭാഗമാണെന്ന് ഗോവിന്ദൻ മാസ്റ്റർ ചോദിച്ചു. അടിയന്തരാവസ്ഥ പ്രഖ്യാപിച്ച പാരമ്പര്യമുള്ള ഇന്ത്യൻ നാഷണൽ കോൺഗ്രസ് ഒരിക്കലും ഇടതുപക്ഷമാകില്ലെന്നും, ഭാരതീയ ജനത പാർട്ടിയെ പോലെ തന്നെ അവർ തീവ്ര വലതുപക്ഷ നിലപാടുകളാണ് സ്വീകരിക്കുന്നതെന്നും അദ്ദേഹം ആരോപിച്ചു. നെഹ്രുവിസത്തെക്കുറിച്ചുള്ള അടിസ്ഥാന ധാരണ പോലും സതീശനില്ലെന്നും, വെറും വാചകക്കസർത്ത് കൊണ്ട് ആരും ഇടതുപക്ഷമാകാൻ കഴിയില്ലെന്നും അദ്ദേഹം കൂട്ടിച്ചേർത്തു.

തൊഴിലാളി വർഗ്ഗ സമരങ്ങൾ ലോകത്ത് ഒരിക്കലും കാലഹരണപ്പെടില്ലെന്നും, സാമൂഹിക പരിവർത്തനം അനിവാര്യമായിടത്തോളം അത് തുടരുമെന്നും അദ്ദേഹം വ്യക്തമാക്കി. തൊഴിലാളികളുടെ അവകാശമായ ഡി.എ (DA) കുടിശ്ശിക സർക്കാർ തീർപ്പാക്കണമെന്നതാണ് പാർട്ടിയുടെയും സർക്കാരിന്റെയും നയമെന്നും അദ്ദേഹം പറഞ്ഞു.