ചേരിചേരാ രാജ്യങ്ങൾക്ക് നേതൃത്വം നൽകിയിരുന്ന ഇന്ത്യയുടെ അന്താരാഷ്ട്ര നിലവാരം മോദിയുടെ ഭരണത്തിൽ തകർന്നുവെന്ന് സിപിഐ എം ജനറൽ സെക്രട്ടറി എം. എ. ബേബി ആരോപിച്ചു. പ്രധാനമന്ത്രി അമേരിക്കയ്ക്ക് മുന്നിൽ കീഴടങ്ങിയിരിക്കുകയാണെന്നും, നുണപ്രചാരണങ്ങളിലൂടെ ജനങ്ങളെ വഞ്ചിക്കുകയാണെന്നും അദ്ദേഹം കുറ്റപ്പെടുത്തി.

ട്രംപ് അന്താരാഷ്ട്ര കുറ്റവാളിയാണെങ്കിലും അത് തുറന്നു പറയാൻ മോദിക്കാകുന്നില്ലെന്നും, ഇരുവരും അടുത്ത ബന്ധം പുലർത്തുകയാണെന്നും അദ്ദേഹം പരിഹസിച്ചു. കേരളത്തിൽ ജാഥ നടത്തുന്ന ചില പ്രാദേശിക നേതാക്കളും പച്ചക്കള്ളം പറയുന്നതിൽ മോദിയെ മാതൃകയാക്കുകയാണെന്നും അദ്ദേഹം പറഞ്ഞു.

എൽഡിഎഫിനെ ശക്തിപ്പെടുത്തുകയും ജനക്ഷേമപരമായ ഇടതുപക്ഷ സർക്കാരിന് തുടർച്ച ഉറപ്പാക്കുകയും ചെയ്യുന്നതാണ് പാർട്ടിയുടെ പ്രധാന കടമയെന്ന് അദ്ദേഹം വ്യക്തമാക്കി. പാർട്ടിയുടെ താൽപ്പര്യം എല്ലാ വ്യക്തിതാൽപ്പര്യങ്ങൾക്കും മുകളിലായിരിക്കണമെന്ന് ഓർമ്മിപ്പിച്ച അദ്ദേഹം, വ്യക്തിപരമായ പ്രാധാന്യത്തേക്കാൾ ജനങ്ങളെ അണിനിരത്തി പാർട്ടിയുടെ ബഹുജന സ്വാധീനം വർധിപ്പിക്കാനാണ് സഖാക്കൾ ശ്രദ്ധ കേന്ദ്രീകരിക്കേണ്ടതെന്ന് പറഞ്ഞു.

രാജ്യം ഗുരുതരമായ രാഷ്ട്രീയ പ്രതിസന്ധി നേരിടുകയാണെന്നും അദ്ദേഹം മുന്നറിയിപ്പ് നൽകി. ആസ്സാം മുഖ്യമന്ത്രി Himanta Biswa Sarmaയെ ആർ എസ് എസിന്റെ ‘പോസ്റ്റർ ബോയ്’ എന്ന് വിശേഷിപ്പിച്ച ബേബി, അദ്ദേഹം പരസ്യമായി വംശഹത്യയ്ക്ക് ആഹ്വാനം നടത്തുകയാണെന്നും അത് ഭരണഘടനാ ലംഘനമാണെന്നും ആരോപിച്ചു. ഇത്തരം വിഷയങ്ങളിൽ സുപ്രീം കോടതി സ്വീകരിക്കുന്ന നിലപാടുകൾ രാജ്യത്തിന്റെ തകർച്ചയുടെ സൂചനയാണെന്നും അദ്ദേഹം പറഞ്ഞു.

കോൺഗ്രസ് നേതാക്കൾ ഭാവിയിൽ ബിജെപിയിലേക്ക് ചേക്കേറുന്ന സാഹചര്യമാണിതെന്നും, പല ദേശീയ വിഷയങ്ങളിലും കോൺഗ്രസ് നിശബ്ദത പാലിക്കുകയാണെന്നും അദ്ദേഹം വിമർശിച്ചു.

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയും അദ്ദേഹം കടുത്ത വിമർശനം ഉന്നയിച്ചു. കേരള കേഡർ ഐഎഎസ് ഉദ്യോഗസ്ഥനായ അദ്ദേഹം മോദി-അമിത് ഷാ കൂട്ടുകെട്ടിന്റെയും നാഗ്പൂരിന്റെയും താൽപ്പര്യങ്ങൾക്കനുസരിച്ചാണ് പ്രവർത്തിക്കുന്നതെന്നും ഇത് കേരളത്തിന് തന്നെ നാണക്കേടാണെന്നും അദ്ദേഹം ആരോപിച്ചു.

എൽഡിഎഫിന് അഭിമാനകരമായ വിജയം ഉറപ്പാക്കാൻ ഓരോ സഖാക്കളും ഒത്തൊരുമിച്ച് പ്രവർത്തിക്കണമെന്നും, വ്യക്തിപരമായ സമീപനങ്ങൾക്ക് അപ്പുറം മുന്നണിയെ ശക്തിപ്പെടുത്തുന്ന വാക്കും പ്രവൃത്തിയും ഓരോരുത്തരിലും പ്രതിഫലിക്കണമെന്നും എം. എ. ബേബി ആഹ്വാനം ചെയ്തു.