കോണ്‍ഗ്രസ് വിട്ട് ഇടതുമുന്നണിയിലെത്തിയ ജോസ് കെ. മാണി എ.കെ.ജി സെന്ററില്‍ എത്തി. എ.കെ.ജി സെന്ററില്‍ എത്തിയ ജോസ് കെ. മാണി ഇടത് നേതാക്കളുമായി കൂടിക്കാഴ്ച നടത്തി. സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍, എല്‍.ഡി.എഫ് കണ്‍വീനര്‍ എ.വിജയരാഘവന്‍ തുടങ്ങിയ നേതാക്കളുമായായിരുന്നു കൂടിക്കാഴ്ച.
ഇന്ന് രാവിലെ എം.എന്‍ സ്മാരകത്തില്‍ ജോസ് എത്തിയിരുന്നു. എ.കെ.ജി സെന്ററിന്റെ വാഹനത്തിലായിരുന്നു അദ്ദേഹം എം.എന്‍ സ്മാരകത്തിലെത്തിയത്. അതിന് ശേഷം വാഹനം നേരെ എ.കെ.ജി സെന്ററിലേക്ക് പോകുകയായിരുന്നു. കൂടിക്കാഴ്ചയ്ക്ക് ശേഷം എ.കെ.ജി സെന്ററിന് പുറത്തുവരെ ചെന്നാണ് കോടിയേരിയും വിജയരാഘവനും ജോസ് കെ. മാണിയെ യാത്രയാക്കിയത്.
കോടിയേരി ബാലകൃഷ്ണനേയും കണ്‍വീനറേയും മറ്റ് നേതാക്കളേയും കണ്ടെന്നും പഞ്ചായത്തു തെരഞ്ഞെടുപ്പുമായി ബന്ധപ്പെട്ട ചര്‍ച്ചകളും ഭാവി പ്രവര്‍ത്തനങ്ങളുമെല്ലാം ചര്‍ച്ച ചെയ്‌തെന്നും ജോസ് കെ. മാണി പറഞ്ഞു. ‘വേറെ വലിയ കാര്യങ്ങള്‍ ഒന്നും ഇല്ല. വന്നു, കണ്ടു. നിലപാട് അറിയിച്ചു. ഒരുമിച്ച് ചേര്‍ന്ന് പ്രവര്‍ത്തിക്കാനുള്ള തീരുമാനമെടുത്തു. പ്രധാനപ്പെട്ട എല്ലാ നേതാക്കന്‍മാരും ഞങ്ങളെ സ്വാഗതം ചെയ്തു. തദ്ദേശതെരഞ്ഞെടുപ്പിന് മുന്‍പ് മുന്നണി പ്രവേശനം ഉണ്ടാകണമെന്നാണ് ആഗ്രഹം. അതുണ്ടാകുമെന്നാണ് പ്രതീക്ഷ,’ ജോസ് കെ. മാണി പറഞ്ഞു.
