ബി.ജെ.പി ശക്തമാകുന്നത് തടയുക എന്ന ലക്ഷ്യത്തോടെ പശ്ചിമ ബംഗാളില്‍ കോണ്‍ഗ്രസുമായി തിരഞ്ഞെടുപ്പ് സഖ്യത്തിന് സി.പി.എം ഒരുങ്ങുന്നു. ഇതിനായി സി.പി.എം പൊളിറ്റ് ബ്യൂറോ അനുമതി നല്‍കി. തീരുമാനത്തെ കേരള ഘടകം പിന്തുണച്ചു. ഒക്ടോബര്‍ 30, 31 തിയതികളില്‍ നടക്കുന്ന കേന്ദ്ര കമ്മിറ്റി യോഗത്തില്‍ കോണ്‍ഗ്രസ് സഖ്യം വിശദമായ ചര്‍ച്ചയ്ക്ക് വരും.

മുന്‍പ് ബംഗാളില്‍ തൃണമൂല്‍ കോണ്‍ഗ്രസ് മാത്രമായിരുന്നു എതിരാളികളെങ്കില്‍ ബി.ജെ.പി ഇപ്പോള്‍ ശക്തമായി വളര്‍ന്നു. ഇത്കൂടി പരിഗണിച്ചാണ് കോണ്‍ഗ്രസ് സഖ്യത്തിന് സി.പി.എം ഒരുങ്ങുന്നത്. അതേസമയം പശ്ചിമ ബംഗാളില്‍ സി.പി.എം നേതൃത്വത്തിലുള്ള ഇടതുമുന്നണിയുമായി തിരഞ്ഞെടുപ്പു സഖ്യത്തിനു തയാറാണെന്ന് ബംഗാളില്‍ വീണ്ടും പി.സി.സി അധ്യക്ഷനായി ചുമതലയേറ്റ അധീര്‍ രഞ്ജന്‍ ചൗധരി നേരത്തെ വ്യക്തമാക്കിയിരുന്നു.