രാജ്യത്തെ കര്‍ഷകര്‍ ‘ദില്ലി ചലോ’ മുദ്രാവാക്യം ഉയര്‍ത്തി ഡല്‍ഹിയില്‍ പ്രവേശിച്ചാല്‍ തടവില്‍ പാര്‍പ്പിക്കുന്നതിനു താല്‍ക്കാലികമായി 9 സ്റ്റേഡിയങ്ങള്‍ വിട്ടുനല്‍കണമെന്ന ഡല്‍ഹി പോലീസിന്റെ അപേക്ഷ തള്ളി അരവിന്ദ് കേജ്രിവാള്‍ സര്‍ക്കാര്‍.

അതേസമയം കേന്ദ്രത്തിലെ നരേന്ദ്ര മോദി സര്‍ക്കാരിന്റെ വിവാദ കാര്‍ഷിക നിയമങ്ങള്‍ പിന്‍വലിക്കണം എന്നാവശ്യപ്പെട്ട് അയല്‍ സംസ്ഥാനങ്ങളില്‍ നിന്നു പുറപ്പെട്ട കര്‍ഷകരെ ഡല്‍ഹിയില്‍ പ്രവേശിക്കാന്‍ അനുവദിക്കില്ലെന്ന നിലപാടില്‍ ഉറച്ച് നില്‍ക്കുകയാണ് ഇപ്പോഴും ഡല്‍ഹി പോലീസ്.

ഡല്‍ഹിയിലേക്കുള്ള വഴി കോണ്‍ക്രീറ്റ് സ്ലാബുകളും കമ്പിവേലികളും കൊണ്ട് പോലീസ് പൂര്‍ണമായി അടച്ചു. മടങ്ങിപ്പോകാന്‍ പലതവണ ആവശ്യപ്പെട്ടിട്ടും കര്‍ഷകര്‍ വഴങ്ങാത്ത സാഹചര്യത്തില്‍ നടപടി കടുപ്പിക്കാനാണ് നീക്കം. കര്‍ഷകരെ നിരീക്ഷിക്കാന്‍ ഡ്രോണുകള്‍ അടക്കമുള്ള ആധുനിക സംവിധാനങ്ങളും പോലീസ് സജ്ജമാക്കി.