കൊല്ലത്ത് നടന്ന സി.പിഐ.എം പ്രവര്‍ത്തകന്‍ മണിലാലിന്റെ കൊലപാതകം അത്യന്തം അപലപനീയമെന്ന് സി.പി.ഐ.എം സംസ്ഥാന സെക്രട്ടറി എ .വിജയരാഘവന്‍. സംസ്ഥാനത്തെ സമാധാനാന്തരീക്ഷം തകര്‍ക്കാനുള്ള സംഘപരിവാറിന്റെ ഗൂഡാലോചനയാണ് നടക്കുന്നത്. പ്രതിയ്ക്ക് ബി.ജെ.പിയില്‍ അംഗത്വം നല്‍കിയത് സംസ്ഥാന അധ്യക്ഷന്‍ കെ. സുരേന്ദ്രന്‍ തന്നെയാണ്, തദ്ദേശ തെരഞ്ഞെടുപ്പ് മുന്നില്‍ കണ്ടുള്ള അക്രമമാണിതെന്നും വിജയരാഘവന്‍ പറഞ്ഞു.

വ്യക്തി വിരോധം കാരണമുള്ള കൊലപാതകമെന്നത് ബി.ജെ.പിയുടെ സ്ഥിരം ന്യായീകരണമാണെന്നും അദ്ദേഹം പറഞ്ഞു. അതേസമയം, കൊലപാതകത്തില്‍ ബി.ജെ.പി പ്രവര്‍ത്തകന്‍ പിടിയിലായി. കേസില്‍ പട്ടംതുരുത്ത് തൂപ്പാശ്ശേരിയില്‍ അശോകനെയാണ് പൊലീസ് കസ്റ്റഡിയില്‍ എടുത്തത്. ഇയാള്‍ ദില്ലി പൊലീസില്‍ നിന്ന് വിരമിച്ചയാളാണ്.