സംസ്ഥാനത്ത് ഇന്ന് തദ്ദേശ തെരഞ്ഞെടുപ്പ് നടക്കുന്ന ജില്ലകളില്‍ വോട്ട് ചെയ്യാൻ പോളിംഗ് ബൂത്തിലെത്തുന്നവർ കൊവിഡ് മാനദണ്ഡങ്ങൾ കൃത്യമായി പാലിക്കണമെന്ന് സംസ്ഥാന തെരഞ്ഞെടുപ്പ് കമ്മിഷണർ വി ഭാസ്‌കരൻ. പോളിംഗ് ബൂത്തിൽ വരുമ്പോൾ മാസ്‌ക് ധരിക്കണമെന്നും, സാമൂഹ്യ അകലം കൃത്യമായി പാലിക്കണമെന്നും അദ്ദേഹം അഭ്യർത്ഥിച്ചു.

ജനങ്ങള്‍ സങ്കോചമോ ഭയമോ ഇല്ലാതെ പോളിംഗ് ബൂത്തിലെത്തി വോട്ട് ചെയ്യണം. എല്ലാവരും ആവേശത്തോടെയാണ് ഇക്കുറി തെരഞ്ഞെടുപ്പിനെ സമീപിക്കുന്നതെന്നും നൂറ് ശതമാനം പോളിംഗുണ്ടാകണമെന്നാണ് ആഗ്രഹിക്കുന്നതെന്നും വി ഭാസ്‌കരൻ പറഞ്ഞു.

അതേസമയം, മുൻ മുഖ്യമന്ത്രി വി. എസ് അച്യുതാനന്ദന് പോസ്റ്റൽ വോട്ട് അനുവദിക്കാത്തത് നിയമപരമായാണെന്നും, കൊവിഡ് രോഗികൾക്കും നിരീക്ഷണത്തിൽ കഴിയുന്നവർക്കും മാത്രമേ ചട്ടപ്രകാരം പോസ്റ്റൽ വോട്ട് അനുവദിക്കാനാവൂ എന്നും അദ്ദേഹം വ്യക്തമാക്കി.