മണിപ്പൂരിലെ ഭരണകക്ഷിയായ ബി.ജെ.പിയോട് തന്റെ ആറ് പാർട്ടി എം.എൽ.എമാരിൽ അഞ്ച് പേർ കൂറുമാറി ചേർന്നത് ഭരണഘടനാപരമാണോ എന്ന് ചോദിച്ച് ബിഹാർ മുഖ്യമന്ത്രിയും ജെഡിയു തലവനുമായ നിതീഷ് കുമാർ . കഴിഞ്ഞ മാസം ബിഹാറിൽ ബി.ജെ.പി നേതൃത്വം നൽകുന്ന എൻ.ഡി.എയിൽ നിന്ന് ബന്ധം വേർപെടുത്തിയപ്പോൾ 'ഞങ്ങളുടെ ആറ് മണിപ്പൂർ എം.എൽ.എമാരും ഞങ്ങളെ കാണുകയും ജെ.ഡി.(യു) നൊപ്പമാണെന്ന് ഉറപ്പുനൽകുകയും ചെയ്തു' എന്ന് ജെ.ഡി.(യു) മേധാവി കൂട്ടിച്ചേർത്തു.

"ഞങ്ങൾ എൻഡിഎയിൽ നിന്ന് വേർപിരിഞ്ഞപ്പോൾ, ഞങ്ങളുടെ ആറ് മണിപ്പൂർ എം‌എൽ‌എമാരും ഞങ്ങളെ വന്നു കാണുകയും ജെഡിയുവിനൊപ്പം ഉണ്ടെന്ന് ഉറപ്പ് നൽകുകയും ചെയ്തു. എന്താണ് സംഭവിക്കുന്നതെന്ന് നമ്മൾ ചിന്തിക്കണം. ബിജെപി എം‌എൽ‌എമാരെ പാർട്ടികളിൽ നിന്ന് വേർപെടുത്തുകയാണ്, ഇത് ഭരണഘടനാപരമാണോ? 2024ലെ തിരഞ്ഞെടുപ്പിൽ പ്രതിപക്ഷം ഒന്നിക്കുമെന്നും നിതീഷ് കുമാർ പറഞ്ഞു.

നിതീഷ് കുമാർ ബിഹാറിലെ ബിജെപിയുമായുള്ള ബന്ധം വിച്ഛേദിക്കുകയും കോൺഗ്രസുമായും ആർജെഡിയുമായും 'മഹാഗത്ബന്ധൻ' സഖ്യവുമായി കൈകോർത്ത് ആഴ്ചകൾക്ക് ശേഷം വെള്ളിയാഴ്ച മണിപ്പൂരിലെ ആറ് ജെഡിയു എംഎൽഎമാരിൽ അഞ്ച് പേരും ബിജെപിയിൽ ചേർന്നത് ശ്രദ്ധേയമാണ്.

ഖുമുക്ചം ജോയ്കിഷൻ, എൻഗുർസാംഗ്ലൂർ സനേറ്റ്, എംഡി അച്ചാബ് ഉദ്ദീൻ, മുൻ ഡിജിപി എൽഎം ഖൗട്ടെ, തങ്ജം അരുൺകുമാർ എന്നിവരാണ് ബിജെപിയിൽ ചേർന്ന ജെഡിയു എംഎൽഎമാർ. 'മണിപ്പൂർ ഇപ്പോൾ ജെഡിയു മുക്തമായി' എന്ന് ബിജെപി രാജ്യസഭാ എംപി സുശീൽ കുമാർ മോദി പറഞ്ഞു. താമസിയാതെ ബിഹാറിലെ ജെഡിയു-ആർജെഡി സഖ്യം തകർക്കുമെന്നും സംസ്ഥാനത്തെ ജെഡിയു മുക്തമാക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു