നേതാക്കൾ ജനങ്ങളെ കാണാൻ വീടുകളിലെത്തുകയാണ്‌. പാർടിയെയും നേതാക്കളെയും ജനപ്രതിധികളെയും കുറിച്ച്‌ നിങ്ങൾ പറയണം. സർക്കാരിന്റെ പ്രവർത്തനങ്ങളെകുറിച്ചും പറയണം.  പ്രതികരണം നേരിട്ടറിയാനാണ്‌ ഞങ്ങൾ വന്നത്‌. അനന്തംപള്ളയിലെ  എല്ലാവീടുകളിലും എം വി ഗോവിന്ദന്റെ ആമുഖം ഇങ്ങനെ. പിന്നാലെ വീട്ടുകാർ വാചാലകരാകുന്നു. പെൻഷൻ, റേഷൻ, ക്ഷേമ പദ്ധതികൾ, വികസന പ്രവർത്തനങ്ങളെല്ലാം  ചർച്ചയായി. ചോദ്യങ്ങൾ ചോദിച്ചും ഉത്തരങ്ങൾ പറയിപ്പിച്ചുമുള്ള മാഷിന്റെ പതിവുശൈലി. കേന്ദ്ര സർക്കാർ സാമ്പത്തിക കാര്യത്തിൽ സംസ്ഥാനത്തെ പ്രതിസന്ധിയിലാക്കുന്നതും ജനങ്ങൾ ദുരിതമനുഭവിക്കുന്നതും ലളിതമായി പറഞ്ഞുകൊടുത്തു. 

 

പല വീട്ടുകാരും സങ്കടങ്ങളും സന്തോഷങ്ങളും പങ്കുവെച്ചു.  രോഗബാധിതയായ പി മാധവിക്ക്‌  മകളെകുറിച്ചായിരുന്നു ആധി.  കൊച്ചുമകൾക്ക്‌ കേൾവി തകരാറുണ്ട്‌.  ശ്രവണസഹായി ഉപയോഗിക്കുന്നു. എൻ പി ജമീലക്ക്‌ അഞ്ച്‌ വർഷമായി ഹൃദ്രോഗമുണ്ട്‌. കൂടെയുണ്ടായ പി നബീസക്ക്‌ മൂന്നുവർഷമായി അർബുദമാണ്‌. ഇവർക്ക്‌ മുഖ്യമന്ത്രിയുടെ ദുരിതാശ്വാസനിധിയിൽനിന്ന് സഹായമെത്തിക്കാൻ ഇടപെടുമെന്ന്‌  അറിയിച്ചു.  നീലേശ്വരം നാഗച്ചേരി ക്ഷേത്ര കൂട്ടായിക്കാരൻ വിനുവിന്റ വീട്ടിലുമെത്തി. ജില്ലാ സെക്രട്ടറി എം വി ബാലകൃഷ്ണൻ, ജില്ലാ സെക്രട്ടറിയറ്റംഗം വി വി രമേശൻ, അഡ്വ. പി അപ്പുക്കുട്ടൻ, കെ രാജ്‌മോഹൻ,  ന​ഗരസഭാ ചെയർമാൻ കെ വി സുജാത എന്നിവരും ഒപ്പമുണ്ടായി . ബുധൻ രാവിലെ 9.30 മുതൽ അജാനൂർ ലോക്കലിൽ  എം വി ഗോവിന്ദൻ  ഗൃഹസന്ദർശനംനടത്തും.