കേരളാ ഗവര്‍ണര്‍ ആരിഫ് മുഹമ്മദ് ഖാൻ പങ്കെടുക്കുന്ന പരിപാടിയില്‍ കറുത്ത വസ്ത്രത്തിന് വിലക്ക്. മംഗലപുരത്ത് ബിഷപ്പ് പെരേര മെമ്മോറിയൽ സ്കൂളിന്റെ വാർഷിക ആഘോഷ ചടങ്ങിലാണ് ആരും കറുത്ത വസ്ത്രം ധരിക്കരുതെന്ന് നിര്‍ദേശം നല്‍കിയത്.

ബുധനാഴ്ച വൈകീട്ടാണ് സ്കൂളിന്റെ 46–ാം വാർഷിക ചടങ്ങ്. വാർഷിക ആഘോഷ ചടങ്ങിന് പ്രിൻസിപ്പൽ രക്ഷിതാക്കളുടെ വാട്സ്ആപ്പ് ഗ്രൂപ്പിലിട്ട സന്ദേശത്തിലാണ് കറുത്ത വസ്ത്രം ഒഴിവാക്കണമെന്ന നിർദേശമുള്ളത്. കാരണം ഒന്നും ചൂണ്ടിക്കാട്ടിയിട്ടില്ല.

പൊലീസിന്റെ നിർദേശമാണോ സ്കൂളിന്റെ നിർദേശമാണോ എന്നതിൽ വ്യക്തതയില്ല. കറുത്ത വസ്ത്രത്തിന് വിലക്ക് എന്ന വിവരം അറിഞ്ഞിട്ടില്ലെന്നും സ്കൂളില്‍ യൂണിഫോം ഉണ്ടല്ലോ എന്നുമാണ് ഗവര്‍ണര്‍ പ്രതികരിച്ചത്.