പത്ത് വർഷം പ്രധാനമന്ത്രിപദത്തിൽ മുഴുവൻ കാലവും പൂർത്തിയാക്കിയ മൻമോഹൻ സിങ്​ ആ പദവിയിൽ എത്തുന്നതിനുമുമ്പ്​, ഏഴു പ്രധാനമന്ത്രിമാരെ സേവിച്ചു. ഇത്രയും തലവന്മാരുടെ സാമ്പത്തിക തീരുമാനങ്ങളുടെ പിന്നിലെ പ്രധാന ബുദ്ധികേന്ദ്രമായിരുന്നു ഈ തലപ്പാവുകാരൻ.

ഇതിനർത്ഥം ഇന്ദിര മുതൽ തന്റെ രണ്ടാം ഘട്ടം അവസാനിക്കുന്നതു വരെയുള്ള ഇന്ത്യയുടെ സാമ്പത്തികനയങ്ങളുടെ പ്രേരകശക്തി മൻമോഹനായിരുന്നു എന്നതാണ്​. 1971ൽ ഇന്ദിരയുടെ രണ്ടാംവരവിൽ കേ​ന്ദ്ര വാണിജ്യ വകുപ്പിൽ സാമ്പത്തിക ഉപദേഷ്​ടാവായാണ് അദ്ദേഹം ​ഔദ്യോഗിക ജീവിതം ആരംഭിക്കുന്നത്​.

ഇന്ദിര ഗാന്ധിയുടെ കാലത്തെ സാമ്പത്തിക കുതിപ്പിനു പിന്നിലെ പ്രധാന കരുത്ത്​ അദ്ദേഹമായിരുന്നു. കൂടാതെ മൊറാർജി ദേശായ്​, ചരൺസിങ്​, രാജീവ്​ ഗാന്ധി, വി.പി. സിങ്​, ചന്ദ്രശേഖർ, പി.വി. നരസിംഹറാവു എന്നിവർക്കൊപ്പവും മൻമോഹൻ പ്രവർത്തിച്ചു.

ഇന്ദിര ഗാന്ധിയുടെ കാലത്തെ സാമ്പത്തിക കുതിപ്പിനു പിന്നിലെ ഊർജത്തെ നന്നായി അറി യുന്നതിനാലായിരുന്നു നരസിംഹറാവു ഇദ്ദേഹത്തെ ധനമ​ന്ത്രിപദത്തിൽ എത്തിച്ചത്​. സ്വന്തം പാർട്ടിയിൽനിന്നുള്ള എതിർപ്പുകൾ മറികടന്നാണ്​ അന്ന് ഈ നിയമനമുണ്ടായത്​. ഇതിലൂടെ ലോകത്തെ ഏറ്റവും ശ്രദ്ധേയനായ ധനമന്ത്രിയായി അദ്ദേഹം മാറിയെന്നത്​ കാലത്തെ തോൽപ്പിച്ച ചരിത്രം.