ഹരിനഗറില്‍ വെച്ച് തന്റെ കാര്‍ ആക്രമിക്കപ്പെട്ടതായി അരവിന്ദ് കെജ്രിവാള്‍. തന്നെ ആക്രമിച്ചതിന് പിന്നില്‍ കേന്ദ്ര ആഭ്യന്തരമന്ത്രി അമിത് ഷായാണെന്നും അദ്ദേഹം പറഞ്ഞു. എതിര്‍സ്ഥാനാര്‍ത്ഥിയുടെ അനുയായികളായ അക്രമികളെ തന്റെ പൊതുയോഗത്തില്‍ പ്രവേശിക്കാന്‍ ഡല്‍ഹി പൊലീസ് അനുവദിച്ചതായും അദ്ദേഹം ആരോപിച്ചു.

ബിജെപിയുടെ സ്വകാര്യ സൈന്യമായി ഡല്‍ഹി പൊലീസിനെ അമിത് ഷാ മാറ്റിയിരിക്കുകയാണെന്നും കെജ്രിവാള്‍ എക്‌സില്‍ കുറിച്ചു. തിരഞ്ഞെടുപ്പ് കമ്മീഷനെതിരേയും കെജ്രിവാള്‍ വിമര്‍ശനമുന്നയിച്ചു.

ഒരു ദേശീയ പാര്‍ട്ടിയുടെ നേതാക്കളും അധ്യക്ഷനും നിരന്തരം ആക്രമിക്കപ്പെട്ടിട്ടും ഫലപ്രദമായ ഒരു നടപടിയും സ്വീകരിക്കാന്‍ തിരഞ്ഞെടുപ്പ് കമ്മീഷന് സാധിക്കുന്നില്ലല്ലോ എന്ന് കെജ്രിവാള്‍ ചോദിച്ചു. ഇത് കമ്മീഷനെതിരെ ചോദ്യങ്ങളുയര്‍ത്തുന്നുവെന്നും അദ്ദേഹം പറഞ്ഞു.