വി.ഡി. സവർ​കർക്കെതിരെ ഗുരുതര ആരോപണങ്ങളുമായി പ്രശസ്ത പത്രപ്രവർത്തകനും എഴുത്തുകാരനുമായ അരുൺ ഷൂരിയുടെ പുതിയ പുസ്തകം. മഹാത്മാ ഗാന്ധിയെ കുറിച്ചും സുഭാഷ് ചന്ദ്രബോസിനെ കുറിച്ചും സവർകർ നുണകൾ പറഞ്ഞുപരത്തിയെന്നും ആനുകൂല്യങ്ങൾക്ക്‌ വേണ്ടി ബ്രിട്ടീഷുകാരോട് യാചിച്ചുവെന്നും അരുൺ ഷൂരി പുസ്തകവുമായി ബന്ധപ്പെട്ട് കരൺ ഥാപ്പറുമായി നടത്തിയ ചർച്ചക്കിടെ വെളിപ്പെടുത്തി. 1908ൽ ലണ്ടനിലെ ഇന്ത്യ ഹൗസിൽ ഗാന്ധിയും താനും സുഹൃത്തുക്കളെ പോലെ കഴിഞ്ഞുവെന്ന് സവർകർ പറഞ്ഞുപരത്തി. ഇത് കള്ളമായിരുന്നുവെന്നും ആ സമയത്ത് ഗാന്ധി ലണ്ടൻ നഗരത്തിൽ പോലുമുണ്ടായിരുന്നില്ലെന്നും ഷൂരി ചൂണ്ടിക്കാട്ടി.

ഏതൊരാളെയും ഗാന്ധി അഭിസംബോധന ചെയ്യാറുള്ളത് സുഹൃത്തേ എന്നാണ്. ഹിറ്റ്ലർക്ക് പോലും അദ്ദേഹം എന്റെ പ്രിയപ്പെട്ട സുഹൃത്തെ എന്ന് അഭിസംബോധന ചെയ്താണ് എഴുതിയിട്ടുള്ളത്. ഇക്കാര്യത്തിൽ സംശയമുള്ളവർ ഗാന്ധിക്ക് പലപ്പോഴും സവർകർ നൽകിയിട്ടുള്ള വിശേഷണങ്ങൾ പരിശോധിച്ചാൽ അത് തീർന്നുകിട്ടുമെന്നും ഷൂരി പറഞ്ഞു. സഞ്ചരിക്കുന്ന പ്ലേഗ് എന്നും തലയ്ക്ക് വെളിവില്ല എന്നുമാണ് പലപ്പോഴും സവർകർ ഗാന്ധിയെ കുറിച്ച് പറഞ്ഞിട്ടുള്ളത്. ഇക്കാര്യങ്ങളെ കുറിച്ച് വിശദീകരിക്കാൻ എന്റെ പുസ്തകത്തിൽ രണ്ട് പേജുകൾ മാറ്റിവെച്ചിട്ടുണ്ടെന്നും ഷൂരി സൂചിപ്പിച്ചു.

ഇതുപോലെയാണ് സവർകർ സുഭാഷ് ചന്ദ്രബോസിനെ കുറിച്ചു പറഞ്ഞിട്ടുള്ളതും. ബോസിനെ സ്വാധീനിച്ചിട്ടുണ്ടെന്നും പലപ്പോഴും അദ്ദേഹത്തെ ഉപദേശിച്ചിട്ടുണ്ട് എന്നുമൊക്കെയാണ് സവർകർ അവകാശപ്പെട്ടിട്ടുള്ളത്. ഇന്ത്യയിൽ നിന്ന് രക്ഷപ്പെടാനും ഇന്ത്യൻ നാഷനൽ ആർമി സ്ഥാപിക്കാനും ഇന്ത്യയുടെ സമ്പൂർണ സ്വാതന്ത്ര്യം പ്രഖ്യാപിക്കാനും താൻ ബോസിന് ഉപദേശം നൽകിയെന്നാണ് സവർകർ പറഞ്ഞത്. ഇതെല്ലാം കള്ളമാണ്. സവർകർ ഒരിക്കലും പശുവിനെ ആരാധിച്ചിരുന്നില്ല. മറ്റ് മൃഗങ്ങളെ പോലെയാണ് അദ്ദേഹം പശുവിനെയും കണ്ടത്. പശുമാംസം ഭക്ഷിക്കുന്നതിനെ പോലും സവർകർ എതിർത്തിരുന്നില്ല.-ഷൂരി വിശദീകരിച്ചു.

സവർകറെ തുറന്നുകാട്ടുകയാണ് പുസ്തകത്തിലൂടെ താൻ ലക്ഷ്യമിടുന്നതെന്നും അരുൺ ഷൂരി വ്യക്തമാക്കി. ഇക്കാര്യങ്ങൾ തുറന്നു പറഞ്ഞാൽ സവർകറുടെ അനുയായികൾ വേട്ടയാടുമെന്ന് നിങ്ങൾ ഭയന്നേക്കാം. എന്നാൽ കെട്ടിച്ചമച്ച എല്ലാ കാര്യങ്ങൾക്കും മീതെ സത്യം തെളിഞ്ഞു നിൽക്കുകയാണ്. സവർകറെ കുറിച്ച് ആളുകൾക്ക് പല സംശയങ്ങളുമുണ്ട്.

അദ്ദേഹം പശുവിനെ ആരാധിച്ചിരുന്നോ? ബ്രിട്ടീഷ് ഭരണത്തിനെതിരെ പോരാടിയിരുന്നോ? അതോ അവരെ പ്രീണിപ്പിക്കാ​നാണോ ശ്രമിച്ചത്…എന്നിങ്ങനെ. ഉടൻ പുറത്തിറങ്ങുന്ന ​​’ദ ന്യൂ ഐക്കൺ: സവർകർ ആൻഡ് ദ ഫാക്ട്സ്’ തന്റെ പുസ്തകത്തിലൂടെ അതിനെല്ലാം വിശദമായ ഉത്തരം ലഭിക്കുമെന്നും അരുൺ ഷൂരി അഭിമുഖത്തിൽ വിശദമാക്കി.