തീരദേശ റോഡുകളുടെ പുനർനിർമ്മാണ പ്രവർത്തനങ്ങളുടെ ഭാഗമായി ജില്ലയിൽ 28 റോഡുകൾ ആദ്യഘട്ടത്തിൽ പൂർത്തിയാക്കാനായതായി ഫിഷറീസ് സാംസ്കാരിക വകുപ്പ് മന്ത്രി സജി ചെറിയാൻ പറഞ്ഞു. ചേർത്തല മണ്ഡലത്തിൽ നിർമ്മാണം പൂർത്തിയാക്കിയ തീരദേശ റോഡുകളുടെ ഉദ്ഘാടനം ഓൺലൈനായി നിർവഹിച്ച് സംസാരിക്കുകയായിരുന്നു മന്ത്രി.

തിരുവനന്തപുരം ഒമ്പത്, കൊല്ലം 15, ആലപ്പുഴ 28, കോട്ടയം രണ്ട്, എറണാകുളം ആറ് , തൃശൂർ പത്ത് , പാലക്കാട്‌ ഒന്ന് , കോഴിക്കോട് നാല് , മലപ്പുറം ആറ്, കണ്ണൂർ പത്ത്, കാസർഗോഡ് രണ്ട് എന്നിങ്ങനെയാണ് നിലവിൽ നിർമാണം പൂർത്തീകരിച്ച് ഉദ്ഘാടനം ചെയ്യപ്പെടുന്ന റോഡുകൾ. ഒന്നാം പിണറായി വിജയൻ സർക്കാരിന്റെ കാലത്ത് 67 മണ്ഡലങ്ങളിലായി 1792 റോഡുകൾക്ക് 783 കോടി രൂപയാണ് ചെലവഴിച്ചത്. ഇതിൽ 90 ശതമാനം റോഡുകളുടെയും നിർമ്മാണം പൂർത്തീകരിച്ച് നാടിന് സമർപ്പിക്കാൻ കഴിഞ്ഞു.

രണ്ടാം സർക്കാരിന്റെ കാലത്ത് 1631 പ്രവൃത്തികൾ പൂർത്തീകരിക്കുകയും 32 പ്രവൃത്തികൾ പുരോഗമിക്കുകയുമാണ്. അതോടൊപ്പം 77 നിയോജകമണ്ഡലങ്ങളിലായി 624 റോഡുകൾ ഏറ്റെടുക്കുകയും 348 കോടി രൂപ ചെലവഴിക്കുകയും ചെയ്തിട്ടുണ്ട്. സംസ്ഥാനത്തെ വിവിധ മണ്ഡലങ്ങളിലായി ഒന്നാംഘട്ടം പൂർത്തീകരിച്ച 93 തീരദേശ റോഡുകളുടെ ഉദ്ഘാടനമാണ് നടന്നുവരുന്നത്. മുഴുവൻ റോഡുകളും സമയബന്ധിതമായി പൂർത്തീകരിച്ച് ഉടനെ നാടിന് സമർപ്പിക്കുമെന്നും മന്ത്രി പറഞ്ഞു.

വയലാർ പഞ്ചായത്ത് കൊടിയനാട്- പാട്ടച്ചിറ റോഡ് പരിസരത്ത് സംഘടിപ്പിച്ച പരിപാടിയിൽ കൃഷി വകുപ്പ് മന്ത്രി പി പ്രസാദ് അധ്യക്ഷനായി. തീരദേശ മേഖലയുടെ വികസനം ലക്ഷ്യമിട്ടുകൊണ്ട് നിരവധി പദ്ധതികളാണ് ഹാർബർ എഞ്ചിനീയറിങ് വകുപ്പ് നടപ്പാക്കുന്നതെന്നും തീരദേശ റോഡുകളുടെ പുനർനിർമ്മാണ പ്രവർത്തനങ്ങൾ വഴി നിരവധി ഗ്രാമീണ റോഡുകൾക്ക് മികച്ച നിലവാരം കൈവരിക്കാനായതായും അദ്ദേഹം പറഞ്ഞു. ശിലാഫലകം അനാച്ഛാദനവും മന്ത്രി നിർവഹിച്ചു.

വയലാർ ഗ്രാമപഞ്ചായത്ത് പ്രസിഡന്റ് ഓമന ബാനർജി, മുഹമ്മ പഞ്ചായത്ത് പ്രസിഡന്റ് സ്വപ്ന ഷാബു, വയലാർ പഞ്ചായത്ത് വൈസ് പ്രസിഡന്റ് എം ജി ഗോപിനാഥൻ നായർ, മുഹമ്മ ഗ്രാമപഞ്ചായത്ത് വൈസ് പ്രസിഡന്റ് എൻ ടി റെജി, പട്ടണക്കാട് ബ്ലോക്ക് പഞ്ചായത്തംഗം എസ് വി ബാബു, വയലാർ പഞ്ചായത്തംഗം ബീന തങ്കരാജ്, ഹാർബർ എൻജിനീയറിങ് ഡിവിഷൻ ആലപ്പുഴ എക്സിക്യൂട്ടീവ് എഞ്ചിനീയർ പി എസ് സ്വപ്ന, ഹാർബർ എഞ്ചിനീയറിങ് സബ്ഡിവിഷൻ അർത്തുങ്കൽ അസിസ്റ്റന്റ് എക്സിക്യൂട്ടീവ് എഞ്ചിനീയർ എം പി സുനിൽ, ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

2024-25 വർഷത്തിൽ ചേർത്തല നിയോജക മണ്ഡലത്തിൽ 96.50 ലക്ഷം രൂപ മുതൽമുടക്കി നിർമ്മാണം പൂർത്തീകരിച്ച കടക്കരപ്പള്ളി ഗ്രാമപഞ്ചായത്ത് നാല്, അഞ്ച്, 11, 13 വാർഡുകളിലെ വട്ടക്കര - കുഞ്ഞിത്തൈ - തൈക്കൽ റോഡ്, 49 ലക്ഷം രൂപ വിനിയോഗിച്ച് നിർമിച്ച തണ്ണീർമുക്കം പഞ്ചായത്ത് 10-ാം വാർഡിലെ മൂർത്തിക്കാവ്- തകിടിവെളി റോഡ്, 30 ലക്ഷം വിനിയോഗിച്ച് നിർമിച്ച തണ്ണീർമുക്കം ഗ്രാമപഞ്ചായത്ത് വാർഡ് 21ലെ കാക്കനാട് ക്ഷേത്രം - പാണാട്ട് കുരിശ്ശടി റോഡ്, 67.6 ലക്ഷം രൂപ വിനിയോഗിച്ച് നിർമ്മിച്ച പട്ടണക്കാട് ഗ്രാമപഞ്ചായത്ത് വാർഡ് മൂന്നിലും വയലാർ പഞ്ചായത്ത് വാർഡ് ഒന്നിലും ഉൾപ്പെട്ടള്ള പത്മാക്ഷിക്കവല-കാവിൽപ്പള്ളി റോഡ്, 61 ലക്ഷം രൂപ ചെലവിൽ നിർമ്മിച്ച വയലാർ ഗ്രാമപഞ്ചായത്ത് വാർഡ് 15ലെ കൊടിയനാട്ട് - പാട്ടച്ചിറ റോഡ്, മുഹമ്മ ഗ്രാമപഞ്ചായത്ത് അറ്, ഏഴ്, 14 വാർഡുകളിലായി 50 ലക്ഷം രൂപ ചെലവിൽ നിർമ്മിച്ച ഡീപ്പോക്കടവ് - പോളക്കാടൻ ജംഗ്ഷൻ റോഡ്, 31.2 ലക്ഷം മുതൽമുടക്കി നിർമിച്ച മുഹമ്മ ഗ്രാമപഞ്ചായത്ത് വാർഡ് 15ലെ തടത്തുവെളി - കാട്ടുകട ഹരിജൻ നഗർ എന്നീ റോഡുകളുടെ ഉദ്ഘാടനമാണ് നടന്നത്.