താമരശ്ശേരിയിൽ വിദ്യാർത്ഥികൾ തമ്മിലുണ്ടായ സംഘർഷത്തിനിടെ ഗുരുതരമായി പരിക്കേറ്റ് ചികിത്സയിലായിരുന്ന പത്താം ക്ലാസുകാരൻ ഷഹബാസ് മരിച്ച സംഭവത്തില്‍ പ്രതികളായ അഞ്ച് വിദ്യാര്‍ഥികളുടെ ജാമ്യാപേക്ഷ തള്ളി. ഇവരെ ദുര്‍ഗുണ പരിഹാര പാഠശാലയിലേക്ക് കൊണ്ടുപോകും. കുട്ടികൾക്ക് പരീക്ഷയെഴുതാനുള്ള അവസരം നൽകുമെന്ന് കോടതി അറിയിച്ചു.

അതേസമയം, ഷഹബാസിന്റെ മരണത്തിൽ വിദ്യാഭ്യാസ വകുപ്പും അന്വേക്ഷിക്കും. പൊതുവിദ്യാഭ്യാസ ഡയറക്ടറെ വിശദമായ വകുപ്പുതല അന്വേഷണം നടത്താൻ ചുമതലപ്പെടുത്തി. സംസ്ഥാന ബാലാവകാശ കമ്മീഷന്‍ സംഭവത്തിൽ സ്വമേധയാ കേസെടുത്തിരുന്നു. ജില്ലാ പൊലീസ് മേധാവിയോടും ശിശുക്ഷേമ സമിതി ചെയര്‍പേഴ്‌സണോടും ബാലാവകാശ കമ്മീഷന്‍ ചെയര്‍പേഴ്‌സണ്‍ വിശദീകരണം തേടി.