കെഎസ്ആർടിസിയെ സാമ്പത്തിക പ്രതിസന്ധിയിലേക്ക് വീണ്ടും തള്ളിവിടാനുള്ള ശ്രമമാണ് നിലവിലെ സർക്കാർ നടത്തുന്നതെന്ന് പ്രതിപക്ഷനേതാവ് പിണറായി വിജയൻ ആരോപിച്ചു. കെഎസ്ആർടിഇഎ സംഘടിപ്പിച്ച പൊതുഗതാഗത സംരക്ഷണ റാലി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

2016-ൽ എൽഡിഎഫ് സർക്കാർ അധികാരത്തിലെത്തുമ്പോൾ കെഎസ്ആർടിസിയുടെ സ്ഥിതി അതീവ ഗുരുതരമായിരുന്നുവെന്ന് പിണറായി വിജയൻ പറഞ്ഞു. ശമ്പളവും പെൻഷനും മാസങ്ങളോളം മുടങ്ങിയ അവസ്ഥയായിരുന്നു. സ്ഥാപനത്തിന്റെ ഭൂരിഭാഗം പ്രവർത്തനങ്ങളും കടബാധ്യതകളുടെ ഭാരം ചുമന്നായിരുന്നു മുന്നോട്ടുപോയിരുന്നത്. അന്ന് ഏകദേശം 3,100 കോടി രൂപയുടെ കടബാധ്യതയാണ് കെഎസ്ആർടിസിക്കുണ്ടായിരുന്നതെന്നും അദ്ദേഹം ചൂണ്ടിക്കാട്ടി.

ഒരു ദിവസം അഞ്ച് കോടി രൂപ വരുമാനം ലഭിച്ചാൽ അതിൽ മൂന്ന് കോടി രൂപ വായ്പാ തിരിച്ചടവിനായി ചെലവഴിക്കേണ്ട സാഹചര്യമുണ്ടായിരുന്നു. പുതിയ വായ്പകൾ ലഭിക്കാത്ത അവസ്ഥയിലായിരുന്ന കെഎസ്ആർടിസിയെ കരകയറ്റാൻ സർക്കാർ ഇടപെട്ടുവെന്നും പൊതുഗതാഗതത്തെ ലാഭനഷ്ട കണക്കുകൾ മാത്രം നോക്കി വിലയിരുത്താനാകില്ലെന്നും അത് സാമൂഹിക ഉത്തരവാദിത്തത്തിന്റെ ഭാഗമാണെന്നും അദ്ദേഹം പറഞ്ഞു.

തൊഴിലാളികളോടും പൊതുമേഖല സ്ഥാപനങ്ങളോടുമുള്ള പ്രതിബദ്ധതയുടെ അടിസ്ഥാനത്തിലാണ് പ്രശ്നപരിഹാരത്തിനായി പ്രത്യേക പഠന സമിതിയെ നിയോഗിച്ചതെന്നും അതിന്റെ ശുപാർശകൾ നടപ്പാക്കി ഘട്ടംഘട്ടമായി പ്രതിസന്ധി മറികടന്നുവെന്നും പിണറായി വിജയൻ പറഞ്ഞു.

നിലവിൽ കെഎസ്ആർടിസിയുടെ സ്ഥിതി വീണ്ടും ആശങ്കാജനകമാണെന്നും അദ്ദേഹം ആരോപിച്ചു. 3,141 സൗജന്യ ബസുകൾ സർവീസ് നടത്തുമെന്ന് പ്രഖ്യാപിച്ചെങ്കിലും നിലവിൽ 2,663 ബസുകൾ മാത്രമാണ് നിരത്തിലിറങ്ങുന്നതെന്ന് അദ്ദേഹം ചൂണ്ടിക്കാട്ടി. സ്പെയർ പാർട്സ് വാങ്ങുന്നതിനും ദിവസേന ഡീസൽ നിറയ്ക്കുന്നതിനും പോലും സാമ്പത്തിക ബുദ്ധിമുട്ടുകൾ നേരിടുന്ന സാഹചര്യമാണുള്ളതെന്നും അദ്ദേഹം പറഞ്ഞു.

കഴിഞ്ഞ മാസം ജീവനക്കാരുടെ പെൻഷൻ വിതരണം പോലും മുടങ്ങിയതായി അദ്ദേഹം ആരോപിച്ചു. ഓണക്കാലത്ത് റെക്കോർഡ് വരുമാനം നേടിയെന്ന അവകാശവാദം യാഥാർഥ്യവുമായി പൊരുത്തപ്പെടുന്നതല്ലെന്നും കോടിക്കണക്കിന് രൂപയുടെ കടബാധ്യതയിൽ സ്ഥാപനം ഇപ്പോഴും തുടരുകയാണെന്നും അദ്ദേഹം കൂട്ടിച്ചേർത്തു.

ദിവസേന ഒരു കോടിയിലധികം രൂപ വായ്പാ തിരിച്ചടവിനായി ചെലവഴിക്കേണ്ട സാഹചര്യം നിലനിൽക്കുകയാണെന്നും പൊതുഗതാഗത മേഖലയെ സംരക്ഷിക്കാൻ സർക്കാർ അടിയന്തര ഇടപെടൽ നടത്തണമെന്നും പിണറായി വിജയൻ ആവശ്യപ്പെട്ടു.