സംസ്ഥാന സ്കൂൾ കായികമേള അട്ടിമറിക്കപ്പെട്ടെന്ന് സിപിഐഎം നേതാവും മുൻ വിദ്യാഭ്യാസ വകുപ്പ് മന്ത്രിയുമായ വി ശിവൻകുട്ടി. മേളയുടെ സ്വർണക്കപ്പും പതാകയും എവിടെയാണെന്ന് വ്യക്തമാക്കണമെന്നും കായികമേള നടത്തേണ്ട ചുമതല കായിക വകുപ്പിനല്ലെന്ന വകുപ്പ് മന്ത്രിയുടെ നിലപാട് വസ്തുതയാണെന്നും അദ്ദേഹം പറഞ്ഞു.

ഇന്ന് രാവിലെ മാധ്യമങ്ങളോട് സംസാരിക്കുകയായിരുന്നു വി ശിവൻകുട്ടി. തൃശൂരിൽ നിന്നുള്ള മന്ത്രിയാണ് ഒ.ജെ. ജനീഷ് എന്നും കായികമേളയുമായി ബന്ധപ്പെട്ട് പ്രശ്നങ്ങൾ ഉണ്ടായപ്പോൾ അദ്ദേഹം സ്ഥലത്തെത്തി കാര്യങ്ങൾ പരിശോധിക്കേണ്ടിയിരുന്നുവെന്നും ശിവൻകുട്ടി വിമർശിച്ചു. കുട്ടികൾക്ക് മലിനജലം ഉൾപ്പെടെയുള്ളവ കുടിക്കേണ്ട സാഹചര്യം പോലും ഉണ്ടായെന്നും അദ്ദേഹം ആരോപിച്ചു.

പി.എം. ശ്രീ പദ്ധതിയുമായി ബന്ധപ്പെട്ട വിഷയത്തിലും ശിവൻകുട്ടി പ്രതികരിച്ചു. പി.എം. ശ്രീയിൽ നിന്ന് പിന്മാറാനുള്ള സർക്കാർ തീരുമാനത്തെ സ്വാഗതം ചെയ്യുന്നതായി അദ്ദേഹം പറഞ്ഞു. വൈകിയാണെങ്കിലും പദ്ധതിയിൽ നിന്ന് പിന്മാറാൻ മുഖ്യമന്ത്രിയും മന്ത്രിയും തീരുമാനിച്ചതിൽ സന്തോഷമുണ്ടെന്നും ശിവൻകുട്ടി കൂട്ടിച്ചേർത്തു.

കൗൺസിലർ സ്ഥാനം രാജിവയ്ക്കുന്നതുമായി ബന്ധപ്പെട്ട് ബിജെപി നേതാവ് ആർ. ശ്രീലേഖ പറയുന്ന കാര്യങ്ങളൊന്നും വിശ്വസിക്കാൻ കഴിയില്ലെന്നും ശിവൻകുട്ടി പറഞ്ഞു. നാക്കെടുത്താൽ കള്ളം മാത്രമാണ് പറയുന്നതെന്നും സ്ഥാനമാനങ്ങൾക്ക് വേണ്ടി ബിജെപിക്കെതിരെ നടത്തിയ ഭീഷണിയായി മാത്രമേ രാജി പ്രഖ്യാപനത്തെ കാണാനാകൂവെന്നും അദ്ദേഹം കൂട്ടിച്ചേർത്തു.