നിയമസഭാ തെരഞ്ഞെടുപ്പിനായി കേരള കോണ്‍ഗ്രസ്​ (എം) കുറ്റ്യാടി സീറ്റ് സി.പി.എമ്മിന്​ വിട്ടുനല്‍കാന്‍ തീരുമാനിച്ചത് എൽഡിഎഫിൻ്റെ ഭരണത്തുടർച്ച ഉറപ്പാക്കാനെന്ന് ചെയര്‍മാന്‍ ജോസ് കെ. മാണി. കുറ്റ്യാടി ഉള്‍പ്പടെ 13 നിയമസഭാ സീറ്റുകളാണ് കേരള കോൺഗ്രസ്​ (എം) ജോസ്​ കെ. മാണി വിഭാഗത്തിന്​ എൽ.ഡി.എഫ്​ നല്‍കിയിരുന്നത്.

‘കേരള കോണ്‍ഗ്രസ്​ എമ്മിനെ സംബന്ധിച്ച് ഇടതുപക്ഷ ജനാധിപത്യ മുന്നണിയുടെ കെട്ടുറപ്പിനും ഐക്യത്തിനുമാണ് പ്രഥമ പരിഗണന നൽകുന്നത്. ഈ തെരഞ്ഞെടുപ്പില്‍ ഇടതുമുന്നണി ജയിക്കേണ്ടതും, എല്‍.ഡി.എഫിന്‍റെ തുടര്‍ഭരണം കേരളത്തില്‍ ഉണ്ടാകേണ്ടതും രാഷ്ട്രീയമായ അനിവാര്യതയാണ് എന്ന ഉന്നതമായ വീക്ഷണത്തിന്‍റെ അടിസ്ഥാനത്തിലാണ് സീറ്റ് വിട്ടുകൊടുക്കാൻ പാർട്ടി സന്നദ്ധമായത്’, ജോസ് കെ മാണി പറഞ്ഞു.

മുന്നണിയുടെ ഐക്യത്തിന് പോറൽ എല്‍പ്പിക്കുന്ന തരത്തിൽ ഒരു പ്രവർത്തനങ്ങളും കേരള കോണ്‍ഗ്രസ്​ (എം) പാര്‍ട്ടിയുടെ ഭാഗത്തുനിന്നും ഉണ്ടാകരുത് എന്ന നിര്‍ബന്ധമുണ്ട്. 13 സീറ്റ് കേരളാ കോണ്‍ഗ്രസ്​ പാര്‍ട്ടിക്ക് പൂർണമായും അവകാശപ്പെട്ടതാണെങ്കിലും നിലവിലെ പ്രത്യേക സാഹചര്യത്തില്‍ ഇടതുമുന്നണി നേതൃത്വവുമായി നടത്തിയ ചര്‍ച്ചയിലാണ് ഈ തീരുമാനം എടുത്തിട്ടുള്ളതെന്നും ജോസ് കെ മാണി കൂട്ടിച്ചേർത്തു.