ഗോപി ആശാൻ പുരോഗമന നിലപാട് സ്വീകരിച്ച മഹാപ്രതിഭയാണെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദൻ മാസ്റ്റർ . തൃശൂർ ബിജെപി സ്ഥാനാർത്ഥി സുരേഷ് ഗോപിയുടെ പ്രചാരണത്തിന്റെ ഭാഗമായി കലാമണ്ഡലം ഗോപിയെ സമീപിക്കാൻ ശ്രമിച്ചുവെന്ന മകന്റെ ആരോപണത്തിനോട് പ്രതികരിക്കുകയായിരുന്നു അദ്ദേഹം.

സുരേഷ് ഗോപി തന്റെ ഉപചാപകരെ ഉപയോഗിച്ച് പ്രവേശിക്കാൻ സാധിക്കാത്ത ഇടത്ത് പ്രവേശിക്കാൻ ശ്രമിച്ചു. ബിജെപി ഒരു മണ്ഡലത്തിലും ശക്തിയല്ല, ഒരു മണ്ഡലത്തിലും ജയിക്കുകയുമില്ലെന്നും അദ്ദേഹം വ്യക്തമാക്കി.

ന്യായ് യാത്രയിലെ ഇടത് പാർട്ടികളുടെ അസാന്നിധ്യത്തെ കുറിച്ചും എം വി ഗോവിന്ദൻ പ്രതികരിച്ചു. കോൺഗ്രസ്സ് പരിപാടിയിൽ ഞങ്ങൾ എന്തിന് പങ്കെടുക്കണം, അദ്ദേഹം ചോദിച്ചു. ജനങ്ങളുടെ ഐക്യ പ്രസ്ഥാനമാണ് വേണ്ടത്. അവിടെ ഐക്യം പറയുന്നു, എന്നിട്ട് പ്രമുഖ നേതാക്കൾ ഇവിടെ വന്ന് മത്സരിക്കുന്നുവെന്നും എം വി ഗോവിന്ദൻ മാസ്റ്റർ കുറ്റപ്പെടുത്തി.